حاجات حاساها او بحس بيها...

ازيكم وعاملين ايه؟؟؟

وحشتووونى

انا حبيت أكتب البوست ده مش عارفة بقي عشان انا عاوزة أكتب ولا عشان عاوزة أتكلم

هو البوست ده عشان شوية حاجات هى أكيد عند كل الناس وبتختلف من شخص لآخر

يعنى أقصد نسبتتها وأهميتها عند كل واحد بتختلف

فيه المهم وفيه الأهم وفيه اللى مش مهم خالص

يعنى مثلا فيه حاجات حاسين بيها وهى أكيد مهمة وضرورية

وحاجات مش بالضرورى نحس بيها او حتى ان حصلت مش فارقة معانا واهه كله محصل بعضه

وفيه حاجات ممكن حدوثها نفسه يغير حياتك وتحس انك كنت لازم برضه فى الاخر تحس بيها

وفيه حاجات نفسك تحس بيها ولما تحصل تبقي ساعتها تقول ياريتنى مافكرت فى الحاجة ديه أصلا

ايه اللخبطة اللى أنا فيها ديه

معلش لخبطتكم معايا

المهم الحاجات اللى انا حاسة بيها وبتفرق معايا

او حاجات ممكن احس بيها بعد كده

او الحاجات اللى مش هتفرق معايا حدوثها

ممكن تتلخص فى بعض حاجات

:يعنى مثلا ممكن نقول الآتى

الأمان: مش عارفة ليه الأمان ممكن يهرب فى أى لحظة

الخوف: مابقتش تفرق معايا أصل الخوف بقي شئ لابد منه

الحب : مش عارفة أصل كل شئ بآوانه

القلق: القلق ياساتر عليه بقي كتير اوى

الاحساس بانك مخنوق:هو ده الاحساس الحالى اللى انا حاسة بيه

الأمل : يمكن حاليا مفيش شئ يبشر بالأمل بس يمكن الأمل مستنينا بعد كده

الزهق: يمكن الزهق نتيجة لحاجات لازم أزهق منها وأكيد زهقانة حاليا

الملل: يمكن من ثبوت الاشياء على ماهى عليه ومفيش جديد أكيد همل

التفائل: ممكن يكون عندى تفائل بسيط ويارب يفضل التفائل ده وميضعش فى وسط الزحمة

الحزن: أكيد فيه حزن فى كل حاجة فى حياتنا

الفرح: برضه الفرح موجود بس ياريته ياخد مساحة أكبر فى حياتنا

النسيان: يووووووووه بننسى كتير بس فيه حاجات مينفعش تتنسي حتى لو ايه اللى حصل مش هنعرف ننساها

الجنان: متوفر بشدة ... ومين فينا مش مجنون

العقل: موجود بس مش عارفة ايه لازمته

أكيد فيه حاجات تانية كتير بس ده اللى انا كتبته او افتكرته من ضمن الحاجات الكتير اللى انا عاوزة أكتبها

هامشي دلوقتى وكفاية عليكم كده

ولما ابقي افتكر باقي الحاجات اللى ممكن احسها او انا حاسة بيها هابقي ارجع تانى عشان اكتبها

ســــلامــــــو عـــلـــــــيـــــــكـــــــــووو

اه ياعقلي

ياعقلي يابو العقول
يامتربي علي الغالي
ياللي ساكن فوق وومزاجك عالي
ياللي فوقك سواد متعالي
وتحتك عمود لكن ايه سواري
وبينهم كشفات نور بتلالي

مصيرك ياسواد تختفي
وتبقي صحـــــــــــراوي
وارجع اانا من تانــــي
زي ما بدأنا مشوارنا الاولاني
ازرع واروي
وابدأ من الاول تاني
وانا ايه اللي حصلي
يانا ياني
وانا مالي مكنت في حالي
كوارث ياعالم مصايب يادنيا
ورئيسنا هايص والشعب لايص
وعريس متنمرد علي الشعب دايس
لهمه حكومه في الحزب لابس
لابس طربوش احمر منقوش نسره مفروس
و الشعب ساكت
وحطا يابطه حكومه اونطه
سرقونا خلاص ودقوا النقصه

خربشات

كتير بتبقى مضطر انك تشارك ناس فرحانين ومبسوطين فرحهم وسعادتهم وأنت في قمة الحزن وقلبك بيصرخ من الألم

الموقف ده بيحصل كتير

بس مش كل الناس بتقدر تعمل كده من غير تكلف

ومن غير ما تكون مضطره

يعني بتفرح لفرح الغير وتركن حزنها في ركن بعيد عشان ماتنكدش عليهم وتعكر صفو فرحتهم

ودول اللى قال عليهم جبران خليل

ما أنبل القلب الحزين الذي لا يمنعه حزنه من أن ينشد أغنية مع القلوب الفرحة

نبل القلب

القلب .... الحزين

للرجل العظيم قلبان : قلب يتألم و قلب يتأمل

قلب يتألم

وقلب ... يتأمل

والألم مصدره حزن يبقيك في صمت . . . وصمتك مدعاة للتأمل في الوجود . . . والمحصله أن الحزن

يتضاعف

وكذلك الألم

وستبقي دائما تذكره

ولن تنساه

تراك تعرف من هو ؟

انه من شاركك هذا الإحساس الراقي جدا بين كل ما نشعر به

شعور الحزن

ولهذا

قد تنسى الذي ضحكت معه ، ولكن لن تنسى الذي بكيت معه

إن . . وجٍد ؟

تليفون الرئيس

أكد مصدر غير مسئول ان موبيل الرئيس
قد اصابه عطل مفاجيء وقد تم عرضه علي كبير الاخصائيين وقد شخصوا الحاله علي انها انهيار عصبي حاد وقد قرر سيادته سفره علي نفقه الدوله لاتمام علاجه في الخارج
وفي حديث صحفي تشرف احد الزملاء بسؤال سياده الشخص الغير مسئول عن اسباب الحاله التي وصل اليها تليفون الرئيس
وقد اجاب سيادته بأن هناك عده اسباب ولكن السبب الجوهري
ان موبيل الرئيس قد تلقي العديد من الرسائل التي تدعو سياده الرئيس الي التنحي عن الحكم والعديد من السباب والشتائم ولكن الرئيس لم يهتم بهذه الرسائل فزادت جرعه الرسائل مما ادي الي فقدان الموبيل حاسه الشم ومنها ادي الي فقدانه حاسه الاهتزاز واصبح علي كلمه واحده كفايه حرام ...
هذا وقد افاد احد المكلفين بالسفر الي الخارج لمرافقه موبيل الرئيس الي ان الاوضاع علي مايرام وان الموبيل انضم الي حزب المجانين
واصبح من المناضلين في سبيل تحرير الوطن المقيد

اخي المواطن عندما تصل اليك رساله من رقم خاص اعلم انها من موبيل الرئيس تدعوك الي ارسال برقيه لسيادته تفيد ما يلي

السلام عليكم ورحمه الله وبركاته

من مواطن مصري مسطول الي رئيس الجمهوريه

اصبح انتخابك عيد شعبي لا ادري من جعله عيد وطني ولكني اشعر بالاشمئزاز لسماع اسمك البهي

اصبحت بلدنا وقر للنشالين والمتفننين بإزهاق ارواح اخواننا المواطنين

سياده الرئيس
اقولها لك صريحه بسيطه واضحه
لا تحتاج الي تفسير او تبحث عنها في القواميس
طز في سيادتك
والفين طز في حضرتك
وثلاث الاف طز زياده علي ماسبق لعلي اصل الي حل
لزوالك من منصبك العالي

واخيرا وليس اخرا
اؤمن دائما بمقوله دائما ما يرددها المناضلون من اجل الحريه وبمناسبه التعديلات الدستوريه التي فرضتها علينا بالقوه استطيع ان اقول

(كل ما تعلي وتعلي وتعلي لازم تتطأطي وتطاطي يابن الواطي)

وبمناسبه اني سأختم برقيتي هذه وسأدفع كل ما املك لكي تصلك رسالتي
احمد لله علي هذا البلاء ليكفر به ذنوبنا وادعوه ان يوفقنا الي ما يحبه ويرضاه
وحسبنا الله ونعم الوكيل
عزيزي المواطن / عزيزتي المواطنه
هذه الكلمات صدرت من شاب مصري مفروس

الانتقام .. وشوف هتنتقم ازاى

الانتقام

متغاظ من حد وعاوز تنتقم منه

فيه حد مضايقك وحارق دمك

فيه حد بيطلع عينك

وانت بقي مش عارف تعمل ايه

تعالا ياعم الحج وانا اقولك تعمل ايه

هى الحكاية بسيطة جداااااا

وسهلة الى حد ما

ومش هتاخد منك كتيييييييير ولا هتستهلك كمان وقت ولا مجهود

بالعكس تقدر تعمل العملية الانتقامية فى اللى غيظك بمنتهى السهولة

نيجى بقي لخطوات الانتقام

الخطوة الاولى

تجيب اللى غيظك وتخليه يعيش فى مصر -فى حال انه عايش مثلا برة مصر

او تخليه يحس بالواقع اللى احنا عايشين فيه -فى حالة ان هو فى الطراوة

الخطوة التانية

خلي اللى غيظك ده يعرف ان فيه تعديلات دستورية

عارف يعنى ايه

فهمه كده ان ده بيحكم عليه بالاعدام

وان مكنش في دماغه ولا همه الكلام ده ومكبر دماغه

اقولك

الخطوة اللى بعد كده

هات له فرخة تكون حلو كده بس بشرط تكون عندها انفلونزا محترمة

واقعده فى اوضة لوحده مع الفرخة وعرفه ان هو ده الموت بعينه

يمكن يتعظ ويبطل يضايقك

ان محوأش فيه يبقي اقولك تعمل ايه

الخطوة التالية

دورلك على ظابط كده يكون محترم من االظباط اللى هما بياخدوا على دماغهم من المدام فيعملوا ايه بيطلعوه على الناس فى الأقسام

واحشر صاحبك ده فى اى قسم وسيبه ياخد اللى ربنا كاتبه له

الخطوة اللى بعد كده

اصر انك تاخد صاحبك اللى حارق دمك ده واقطع له تذكرة فى الطايرة واللى السفينة اللى هتسافر فى اقرب وقت

ومعلش تعالى على نفسك واقطع التذكرة على حسابك

وأوعى تركب معاه واقوله انك هتحصله فى السفينة اللى بعدها

او الطيارة التانية

المهم تكون انت ضامن بقي ان المركبة اللى هو راكبها هتغرق هتغرق يعنى متركبوش فى حاجة تكون نضيفة وكويسة نقي اوحش حاجة وركبه فيها

كده ياما هيموت ياما هيموت

نفرض بقي ان صاحبك اللى غيظك ده زى القطط وبسبع ارواح

ورجعلك تانى اقولك بقي خليه ماشي كده وتعالى عند اول مظاهرة فى البلد وارميه فيها

طبعا هما مش هيتوصوا وهيتمسك هيتمسك

ويالا بقي يستاهل اللى يجرى له

كله من اللى هو عامله فيك

وان طلع منها سليم وعلى خير وبرضه رجعلك تانى

انا بقي مش عارفة اقولك تعمل ايه فيه

انا زهقت من صاحبك ده خلاص ايه القرف ده

هو مزهقش من اللى حصله

بصوا ماما بتقولى خليه يجى يقعد معايا شوية وهو هيزهق ايه رأيكم أنتم

لو ده الحل ابعتوا اى حد مضايقكوا عليا وانا هأقرفه

اهداف سياسيه من خلال اتفاقيات اقتصاديه

هناك علاقه قويه بين الاقتصاد والسياسه ولايمكن الفصل بينهم . ويلعب الاقتصاد دور فعال واساسى فى تحديد السياسات . وكما نرى فى الشرق الاوسط وما به من دمار وتفكك .وما تقوم بيه امريكا (الابن الوفى) واسرائيل فى منطقه الشرق الاوسط .وابرهن كلامى هذا بحروب اسرائيل العديده فى المنطقه . فلماذا اسرائيل تريد سيناء ؟؟؟ لانهم يعلمون ما بها من خيرات ويستطيعون استغلالها لصالهم ولصالح اقتصادهم وهذا سبب من اسباب احتلال اسرائيل لسيناء .وهناك اسباب اخرى لا اريد التطرق اليها منها( انهم يحلمون ويريدون تحقيق حلمهم فى اقامه الدوله اليهوديه الكبرى ( بس ده كبوس ) التى تبداء من الفرات لنهر النيل وهذا هو حلمهم الاكبر . واما حرب العراق فهى حرب اقتصاديه من الدرجه الاولى للاستيلاء على نفط العرق وما به من خيرات تخدم مصالحهم وموقع العراق الاستراتيجى ( حدوده تجمع بين سوريا وايران ) وهذه هى الحرب الظاهره امامنا ولكن هناك حروب اخرى اقوى مما نراه .فمن خلال استغلالها لخيرات تلك البلاد لصالح اقتصادها . فانها ستكون الاقوى فى عالم السياسه .وكما نرى فى مصر ان الاقتصاد هو الذى يخدم السياسه وان هناك علاقه قويه بس الاقتصاد والسياسه كما هو واضح فى تطبق اتفاقيه الكويز التى قبلها وزير التجاره المصرى رشيد محمد رشيد ( محدش يفهمنى غلط هو مش عميل ) قبلها بعد رفض قاطع من الذين سبقوه فى الوزاره .ومن خلال الكويز سوف يكون هناك تعامل وثيق بين مصر واسرائيل مما يضعف دور مصر تجاه القضيه الفلسطينه .وهذا تسيرع غير مبرر من الحكومه المصريه لتطبيع العلاقه مع اسرائيل .وكما انها ستفتح الباب على مصراعيه لاسرائيل لاختراق الاقتصاد المصرى والصناعه المصريه.وهناك اهداف سياسيه تتحقق من خلال الاتفاقيات التجاريه مثل اعتراف مصربالقدس عاصمه لاسرائل ويتضح هذا من خلال النص المبرم فى الاتفاقيه على انه هناك اجتماع دوريا بين الجانبين مره فى القاهره ومره فى القدس وهذا اعتراف رسمى بان القدس عاصمه لاسرائيل .وهناك ايضا مقايضات وصفقات تتم تحت مظله الاقتصاد .مثل صفقه الجاسوس عزام عزام الذى تم الافراج عنه وبعدها مباشره اعلنت الولايات المتحده عن قيام منطقه تجاريه حره بينه وبين مصر . وايضا اتفاقيه الغاز الطبيعى بين مصر واسرائيل وعلاقتها بالافراج عن الطلبه الست .كل هذا يؤكد ان للاقتصاد دور اساسى فى بناء السياسه ولا يمكن تجاهله

لسه فيه أمل

الواحد مننا لازم يكون متفائل على قد ما يقدر لأن اليأس حاجه بشعه والمفروض إننا كشباب نكون أبعد ناس عن اليأس ونسيبه للعالم الكبيرة اللى قربت تودع ومستنيه الأجل ، دول الفئه الوحيده اللى من حقها تيأس من الدنيا وتفقد الأمل
وعلى رأى الست ثومه
الأمل لولاه علايا كنت فى حبك ضحيه

بس يا محترم تيجى تدو حواليك لجل ماتلاقى سبب وجيه

يخليك ماتكونش يائس وعندك أمل

تلاقى كتير

ايه مستغرب ؟ لا صحيح فيه أسباب كتير تخليك مش يائس وعندك أمل

خد عندك

معاك حاجه تاخد فيها الأول ولا أجيبلك كيس ؟

عندك يا ريس الصحه ايوة الشباب صحه صحيح بتدخن وبتاكل أكل ملوث بمبيدات مسرطنه ونظامك الغزائي فى منتهى العك بس برضه ما يمنعش ان انت بصحتك وبعدين يا اخى دانت تبقى جاحد لو قولت غير كده

وبعدين عندك كمان المستقبل هو صحيح علمه عند ربنا بس أنت اللى بتصنعه وعملك النهارده هاتحصد ثمرته بكره ولكل مجتهد نصيب ولا ايه يا مبارك ؟

هاتقولى ماسنكونه رهن بما كناه

هاقولك صلى على النبى

الحياه حلوة والدنيا مرجلشه ولونها بمبى ، ثم يا راجل أنت مستقبلك مشرق

صحيح ماتعلمتش حاجه فى مراحل تعليمك تأهلك لعمل يضمنلك حياة كريمه ، ولو عندك العلم والكفائه مش هاتلاقى الواسطه اللى تحطك على أول السلم ، بس ده لأنك فقرى أنت وأهلك كمان لازم تكون بتعرف تسلك أمورك وتبنى مستقلك بكفاح عن طريق معارفك ومعارف باباك وقرايبك ولا إيه الكلام ؟

عشان كده لازم يكون عندك أمل فى المستقبل وإوعى إوعى تيأس

أستغفر الله العظيم يأس إيه يا راجل

ونسيت أقولك اهم داعم للأمل فى طريق حياتك الممهد الباسم اللى بيضحكلك

إنك مصري

شوفت بقى إنت مغفل ازاى ومش واخد بالك من النعمه اللى أنت فيها يا حج

أنت مصري آآآآآه والله العظيم مصرى

عارف يعنى إيه

يعنى حضارة سبع تلاف سنه يا راجل يعنى الفراعنه والأهرامات وأبو سمبل وأم سمبل وسمبل نفسه قبل المليون بس

مصرى يعنى الشهامه والكرم والجدعنه ياعم الحج يعنى الأقصر وأسوان وسواقى الفيوم وتل بسطه والهرم المدرج ورع خد بالك من رع ده لأنه مهم جدا رع رعععع

خدت بالك من النعمه اللى أنت فيها يا جاحد

الدنيا كلها تتمنى إنها تكون مكانك بنت حضارة عريقه زيك بس تقول لمين

صحيح أنت دلوقتى بقيت فى الحضيض لاليك سعر ولا وزن ولا طعم ولا لون بس تصدق ليك ريحه ؟

ايوة ريحة العرق اللى تخنق ريحة عرق الغلابه اللى طالع ..... أبوها وطافحين الكوته وصابريييييين

ريحة عرق العمال والصنايعيه والفلاحين والناس اللى تحت تحت قوى

ريحة على قد ما بتخنقك على قد ما بتديلك أمل إن ممكن فى يوم من الأيام

الناس دي تصحى وتاخد حقها من الناس اللى فوق

بس إمتى بقى يا ريس

ربك هو العالم

شوفت بقى إن لسه فيه أمل

قول يارب