29 March 2007

الانتقام .. وشوف هتنتقم ازاى

الانتقام
متغاظ من حد وعاوز تنتقم منه
فيه حد مضايقك وحارق دمك
فيه حد بيطلع عينك
وانت بقي مش عارف تعمل ايه
تعالا ياعم الحج وانا اقولك تعمل ايه
هى الحكاية بسيطة جداااااا
وسهلة الى حد ما
ومش هتاخد منك كتيييييييير ولا هتستهلك كمان وقت ولا مجهود
بالعكس تقدر تعمل العملية الانتقامية فى اللى غيظك بمنتهى السهولة
نيجى بقي لخطوات الانتقام


الخطوة الاولى
تجيب اللى غيظك وتخليه يعيش فى مصر -فى حال انه عايش مثلا برة مصر
او تخليه يحس بالواقع اللى احنا عايشين فيه -فى حالة ان هو فى الطراوة


الخطوة التانية
خلي اللى غيظك ده يعرف ان فيه تعديلات دستورية
عارف يعنى ايه
فهمه كده ان ده بيحكم عليه بالاعدام
وان مكنش في دماغه ولا همه الكلام ده ومكبر دماغه

اقولك
الخطوة اللى بعد كده
هات له فرخة تكون حلو كده بس بشرط تكون عندها انفلونزا محترمة
واقعده فى اوضة لوحده مع الفرخة وعرفه ان هو ده الموت بعينه
يمكن يتعظ ويبطل يضايقك

ان محوأش فيه يبقي اقولك تعمل ايه
الخطوة التالية
دورلك على ظابط كده يكون محترم من االظباط اللى هما بياخدوا على دماغهم من المدام فيعملوا ايه بيطلعوه على الناس فى الأقسام
واحشر صاحبك ده فى اى قسم وسيبه ياخد اللى ربنا كاتبه له

الخطوة اللى بعد كده
اصر انك تاخد صاحبك اللى حارق دمك ده واقطع له تذكرة فى الطايرة واللى السفينة اللى هتسافر فى اقرب وقت

ومعلش تعالى على نفسك واقطع التذكرة على حسابك
وأوعى تركب معاه واقوله انك هتحصله فى السفينة اللى بعدها
او الطيارة التانية
المهم تكون انت ضامن بقي ان المركبة اللى هو راكبها هتغرق هتغرق يعنى متركبوش فى حاجة تكون نضيفة وكويسة نقي اوحش حاجة وركبه فيها

كده ياما هيموت ياما هيموت

نفرض بقي ان صاحبك اللى غيظك ده زى القطط وبسبع ارواح
ورجعلك تانى اقولك بقي خليه ماشي كده وتعالى عند اول مظاهرة فى البلد وارميه فيها
طبعا هما مش هيتوصوا وهيتمسك هيتمسك
ويالا بقي يستاهل اللى يجرى له
كله من اللى هو عامله فيك
وان طلع منها سليم وعلى خير وبرضه رجعلك تانى
انا بقي مش عارفة اقولك تعمل ايه فيه
انا زهقت من صاحبك ده خلاص ايه القرف ده
هو مزهقش من اللى حصله
بصوا ماما بتقولى خليه يجى يقعد معايا شوية وهو هيزهق ايه رأيكم أنتم
لو ده الحل ابعتوا اى حد مضايقكوا عليا وانا هأقرفه


15 comments:

الملاح التائه said...

بدأتى تثبتى الجنان
بوست يجنن يا طأة
كل اللى قلتيه ماحوأش فيه على فكره
وعشان كده أنا هابعتهولك يقعد مع ماما شويه
بس الأول تعرفى مين هو اللى غايظنى وفارسنى ومطلع عين اهلى
عارفه هو مين ؟
أنا
أنا غايظني جدا على فكره
ومخنوق مني
ومنرفزني
كده عرفتى الهدف
عليكى تحديده وإصابته
أتمنالك التوفيق
إشطات

عاشقة الوطن said...

ياملاح ياتائه
الاول انا اقصد ان لو معرفتش تنتقم من اللى غيظك ابعتهولى انا وانا بقي هاطلع عليه الجديد والقديم
أصل انا اشل بصراحة ورخمة جدااااااا
يالا بعترف زى بعضه

وبعدين انت متغاظ من نفسك ليه بس
طيب على العموم ربنا يهديك ياخويا

ولسه الطآآن جاى ورا
وربنا يستر عليا من الجنان الرسمى

وتحياتى

ibn nasser- ابن ناصر said...

ههههههههههه
ده كده شر انتقام ,,يا نهار أسود دا يروح النار أحسن
تحياتي

khaled said...

حلوة كتير
بس نسيتى تركبيه القطر بتاعنا
وممكن نقوله نكتة من بتاعتنا
:)
اقرى الموضوع ده لانه فيه شبه منه انا كمان طلعت عين صاحبى

حاجة تغيظ

shreef said...

بس كده حرام ما اظنش في حد عمل حاجة سيئة لدرجة اخليه يشوف البؤس ده كله..اعرفي ان البؤس ده مكتوب علينا احنا فقط او بمعنى اصح حصرياً للمصريين..سلام

فبركة said...

هى دى الحقيقة فعلا
امبارح كان عمرى عشرين يا مصر صبحت لاقيته 99.9
عجزنا بدرى بدرى يا جدعان ومش هيكون فينا حيل للجواز
ياعينى عليكى يا مصر
اتمنى تشرفينى فى مدونتى المتواضعة

فبركة said...

هى دى الحقيقة يا بنتى
امبارح كان عمرى عشرين صبحت لاقيته 99.9
عايزين نلحق نتجوش بقى عشان الشحة خلاش راحت يا شباب

Sharm said...

تنفعي قائد عسكري هايل

kaed said...

لية يابنتى الأذية دى أنت عايزة اللى تنتقيمى منة تعيشية فى مصر حرام عليكى إية إنت معندكيش قلب و لا إية يا نهار إسود مصر هيا حصلت مصر يا نهار إسود

عاشقة الوطن said...

اولا بعتذر ياجماعة عن تاخرى فى الرد

ibn nasser- ابن ناصر

انت رايك كده يعنى النار أرحم من العيشة هنا
عندك حق ياابن ناصر

بس المهم ننتقم

عاشقة الوطن said...

khaled

على رايك انا نسيت حكاية القطر ديه خااااااااالص
بس كويس انك فكرتنى

ربنا معاه بقي

وهاقرا الموضوع أكيد ان شاء الله

منور ياخالد

عاشقة الوطن said...

shreef

ههههههههههههه
حلوة ياشريف حصريا للمصريين

فعلا هو احنا اللى مكتوب علينا كده ومش لازم نعذب حد معانا

منور ياشريف

عاشقة الوطن said...

فبركة

ليه ياخويا مين ده اللى عجز
الله الله
انت لحقت ياشريف تعجز

طيب ربنا يعينك بقي

وربنا معانا كلنا

منور يافندم

عاشقة الوطن said...

Sharm

أنت شايف كده
طيب خلاص هاجهز نفسي

منور ياشارم

عاشقة الوطن said...

kaed

طيب اعمل ايه بس ياعم قائد ماهو احلى عقاب ليه اعيشه فى مصر

منور ياقائد المنطقة كلها