26 July 2007

تخييييييييل وعيييييييييييييش

تخيل


ماتيجوا نتخيل سوا

اصل مفيش احسن من التخيل والأحلام

عالم التخيل ده عالم اخر

عالم هتعيش فيه ومش هتزهق منه

ولما تتخيل حاجة محدش بيحاسبك عليها ولا بيحاسبك ان انت تخيلك واسع حبيتين

واللى انت بتحلم بيه محدش هيوقفلك على باب تخيلاتك ويقولك استنى ده مينفعش


تخيل وعيش زى ماانت عاوز

تيجوا نتخيل ونعيش سوا

يالااااااااااااااااااااااا

تخيل ان انت مش انت

تخيل ان البلد مش البلد

تخيل ان الناس غير الناس

واللى انت عايش معاهم مش هما اللى انت عايش معاهم دلوقتى

تخيل بقي (المصيبة الكبيرة)ان الريس مش الريس

وان الحكومة مش الحكومة

تخيل بقي البلد حالها كويس وانت عايش مرفهه

تخيل ان انت عندك كل حاجة وكلاللى انت عاوزه بتتمناه

تخيل حياتك اتقلبت من فوق لتحت (بس اوعى توقع)ولاقيت قدامك كنز على بابا بس من غير الاربعين حرامى

(معلش بقي ماانت تتخيل الحاجة الحلوة برضه )


تخيل انك خلاص ربنا فرجها عليك وهتتجوز البنت اللى انت بتحبها ومكنتش عارف

تتقدم لها عشان مفيش شغل ومفيش دخل

ومفيش شقة ولا انت عارف هتتنيل وهتصرف على البيت منين


تخيل بقي وعيش

ماانت مبقتش انت

انت مش انت وبقيت حد تانى غير اللى انت كان عايش معاه
فاهمين حاجة؟؟؟

طيب خلاص


نكمل التخيل بقي

تخيل البلد ديمقراطى

اه تصدق ده فى التخيل

تخيل ان انت بتنتخب اللى انت عاوزه

تخيل أن انت عايش بحرية وبتقول رأيك

ولما الرئيس بتاع البلد ميعجبكش تقوله انه وحش وهو يقبل رأيك

ويعمل اللى يرضى المواطنين والشعب

تخيل ان انت دخلت الكلية اللى انت نفسك فيها بصرف النظر عن مجموعك فى الثانوية العامة

تخيل اصلا ان التعليم اتغير

وبعبع الثانوية العامة مشي وروح بعيد

ومش بيجي بس غير للعيال الوحشة اللى مبتسمعش الكلام

تخيل بقي وعيييييييييش


تخيل حياتك اتملت والفراغ مبقاش له وجود اصلا

تخيل ان انت بقيت مصلح فى البلد وبقي ليك بصمة واضحة وظاهرة فى البلد

تخيييييييييييييييييييييييل


تخيل ان العلماء اللى من البلد نفسها مبقوش بيسافروا برة

ومبقوش بيهربوا من البلد

تخيييييل ان البلد وفرت كل سبل الراحة للعلماء والمخترعيين اللى فيها

تخيل ان انت بقيت حاسس بكيانك ووجودك فى البلد من غير سلطة ولا تحكم من حد

من غير ماتخاف من أمن الدولة ولا من ظباط الأقسام

تخيل انك عايش بجد وعارف انك حر ومش خايف من اى حد

تخيل ان انت اتجوزت وجبت أولاد زى السكر وهتعلمهم أحلى تعليم واحسن حاجة هتعيشهم فيها

طبعا بعد ماتكون تخيلت ان دخلك بقي مستريح اوى وكبير زى بلاد اوربا والدول المتقدمة

تخيل ان كل بلاد العالم عايشة فى سلام

تخيل ان الحالة الاقتصادية للبلد تمام اوى وعال العال

تخيل ان المياه اللى بتشربها هى أحلى مياة ومش ملوثة

تخيل ان البلد نضيفة جدا وانضف شارع متلاقيش غير الهوا بس اللى بيعدى منه يعنى
مفيش حاجة كده ولا كده مرمية على الارض

تخيل ان مفيش عشش على اطراف البلد

وتخيل كمان ان الصرف الصحى تمام اوى عند كل الناس ومفيش مجارى ضاربة

تخيل كمان ان البلد انعدم فيعا الفقرا

تصدق أفقر واحد فى البلد هو اللى كان أغنى واحد من ايام ما كان المليون ده ثروة كبيرة

تخيل حياتك من غير اى مشاحنات ولا خناقات ولا شد وجذب

تخيل ان كل موظف قاعد على مكتبه فى البلد ديه بيشتغل بذمة وضمير وبيشتغل بجد

وبيراعي ربنا فى شغله-ومابيقلش فوت علينا بكرة ولا سايب درج المكتب مفتوح-فاهمنى طبعا


تخيل كل اللى نفسك فيه وكل اللى انت عاوزه وبتحلم بيه

تخيل حياتك بقي هتبقي عاملة ازاى

تخيلوا بقي كل اللى نفسكم فيه

اصلي مش فاكرة ايه تانى ممكن نتخيله


بعد كم التخيلات ديه كلها

ياخبببببببببببببببببببر

انا ايه اللى صحانى من النوم دلوقتى

ماانا كنت مبسوطة وعمالة اتخيل براحتى

يالا معلش نكمل تخيل بقي

هااااااااااااااااااااا ..... ماذا بعد

.....................................



معلش ياجماعة انا تخيلي ملخبط شوية بس هو ده التخيل اللى كنت بحلم بيه

ايه رأيكم بقي؟؟؟؟؟؟؟؟؟؟؟؟؟

19 comments:

مشروع انسان said...

ايه ده هو ممكن كل ده يحصل ده نبقى فى الجنة وش فى الدنيا وكمان فى مصر بس جميل ان الواحد يتخيل عشان يحاول يحقق حلمه اصله لو عاش واقعه كده مش هيعرف ازاى يوصل للاحسن
وماله الحلم بس المهم تحقيقه
يلا خير

مشروع انسان said...

ايه ده هو ممكن كل ده يحصل ده نبقى فى الجنة وش فى الدنيا وكمان فى مصر بس جميل ان الواحد يتخيل عشان يحاول يحقق حلمه اصله لو عاش واقعه كده مش هيعرف ازاى يوصل للاحسن
وماله الحلم بس المهم تحقيقه
يلا خير

عاشقة الوطن said...

امام الجيل

على طول منور ياامام البلوج

تصدق ياامام اناكنت كتبت فى اخر البوست تخيل بقي انك دلوقتى فى الجنة
بس رجعت فى كلامى اصل التخيل هيبقي كتييير
الواحد نفسه يتخيل كل حاجة واى حاجة
التخييل ده جزء من الأمل اللى لازم نحس بيه عشان ندى لنفسنا أمل لبكرة ان شاء الله


منور ياامام وشكرا على تعليقك الجميل ده

shabfa2re said...

لالالالالالالالالالالالالا
ان فى التخيل جامد اوى
بتخيل حياتى ومستقبلى
وبتخيل نفسى زوج واب
لدرجة انى بتخيل المشكلات اللى ممكن تقابلنى
ومحضّر الحل
ملحوظة: انا هبقى زووووووج لؤطة

mohand said...

السلام عليكم
وبعد ما اقضيها تخيلات
اصحي من النوم انتحر ولا اعمل ايه؟
تيجي واحده واحده
لان لو كل اللي قولتيه دا حصل
بصراحه هتوه ومش هعرف اروخ اي حته
هحس اني في المريخ
لان كل شئ ذكرتيه في منه بيحصل في بلاد كتير
ومفيش بلد سليمة
اذن اروح اعيش في المريخ واكون البلد اللي تخيلتها احسن
تحياتي

عاشقة الوطن said...

shabfa2re

يابنى هو فيه أجدع من التخيل
تخيييل زى ماانت عاوز وعيش كمان
بس انت بتتخيل كمان المشاكل اللى ممكن تقابلك وحلولها كمان ايه ده ياولاد
لالالا
انت فعلا لؤطة
هأدورلك بقي على عروسة حلوة كده
هههههه
;)

منور ياشاب يافقري ومتبقاش تتأخر علينا فى الزيارات

عاشقة الوطن said...

mohand

لالا تنتحر ايه بس ياراجل
ده اسمه كلام برضه
انت يجيلك الاول صدمة عصبية وبعد كده مستشفى الخنكة ومنها الى الانتقال الى رحمة الله تعالى


بالنسبة للمريخ فهي فعلا أنسب مكان هتلاقيه تمام وهتعرف تعيش فيه براحتك
لاننا كلنا ان شاء الله هنحصلك على طول
ولنذهب جميعا الى المريخ
مش أحسن برضه

بس المواصلات لهناك هتبقي صعبة ولا اييييييه؟؟

يالا ماعلينا

منور يامهند البلوج كله
وزيارتك بتسعدنى جدااا

Van Gogh said...

عاشقة الوطن

اخبارك ايه؟
اتمنى انك تكونى بألف خير وألف سلامة

عارف انى مقصر
بس الظروف بعدتنى فترة عن التدوين

وجاى اطمن

والحق اللى فاتنى و احلام اليقظة الارادية

عارفة

هوه ده تقريبا اللى فاضلنا فى البلد دى

المسموح لينا

اننا نتخيل...نتوهم..نحلم

ويا سلام لو اتجننا كمان

انا بقى سبقتك..واتخيلت حسنى مات
وجمال مقدرش يمسك
وجه واحد زى عمرو موسى
غير الدستور...وحرر القضاء والصحافة والاعلام...وحط مصر على اول الطريق

والشعب فاق
وبقى مدرك انه لازم يعوض الخمسين سنة اللى فاتوا

بس بعد ده كله افتكرت حاجة

لا يغير الله ما بقوم حتى يغيروا ما بأنفسهم

تفتكرى اننا نستحق الحلم ده؟؟

ولا الواقع هو ما نستحقه فعلاً..؟؟

اخيرا تحياتى ليكى

واختملك ببيت لشاعر مجهول على لسان مبارك


هتقبل ححبك...حترفض حلبك
حتطلع هتنزل...حجيبلك جمال

وعجبى
:)

أمــانــى said...

الله يا على التخيييييل
مش عايزة افوق مش عايزة اصحى
اخخخخخخخخخخخخخخخخخخخ
اوعى تعملى صوت
:D
مفيش حاجة بعيدة يمكن ربنا يسهل ويكرمنا

دكتور مستكنيص said...

لو فضلتي تاكلي فراخ كل يوم فطار وغدا وعشا هتبقي بالنسبة لك حاجة عادية انما لو كل يومين وبينها يوم كشري ويوم أي اكل هتحسي بيها
لو ابلد زي مانتي بتقولي كده متعتقديش انك هتحسي بالسعادة الكاملة عشان كده رايي ان اغلب الحاجات دي تحصل بس مش كلها
جزؤ من متعتنا في اننا نتغلب علي مصاعب وناكل ملح ومرار بعد كده حتة بسبوسة
وربنا قال لقد خلقنا الانسان في كبد
لكن للاسف ياعزيزتي مشكلتنا دلوقت اننا مبقناش بناكل الفلرخ في مصر غير مرة في السنة والباقي جبنة حادقة
يارب تكون فكرتي وصلتك

عاشقة الوطن said...

Van Gogh

أهلا فان
ايه النور ده كله
فينك من زمان ياراجل

انا كويسة الحمدلله

بص بقي احنا طبعا منستهلش الحلم ده لاننا برضه مقصرين بس التقصير بيجى نتيجة لحاجات تانية برضه
ان احنا مش عارفين ولا نخد حق ولا باطل فى البلد ديه

بس صح لا يغير الله مابقوم حتى يغيروا مابأنفسهم

وحلو اوى بيت الشعر ده يابنى والاحلى تخيلك لما جيمى هو اللى يممسك الحكم
ده هيبقي مسخرة
ماهو جيمى بقي ووالده المصون اوسنى
وربنا يستر علنا

منور يافان البلوج كله
ويارب تكون بخير دايما ومتغبش عننا تانى

شكرا على التعليق وعلى الزيارة

عاشقة الوطن said...

أمــانــى

انتى عارفة ياامانى ان انا مش عاوزة اصحى فعلا
خايفة اصحى يجرى ليا حاجة ولا حاجة

المهم ان هأحلم شوية ومحدش يصحينى خالص لحد مااصحى لوحدى

منورة يامنمونتى ياجميل البلوج كله

عاشقة الوطن said...

دكتور مستكنيص

الاول انت منور يادكتور واهلا بيك فى البلوج

ثانيا بقي فهمت حضرتك تقصد ايه
واحنا طبعا مش هنفضل ناكل فراخ على طول ولا هنفضل برضه ناكل مش على طول
احنا عاوزين ننوع
مش لازم كل اللى حلمت بيه او تخيلته يتحقق
بس على الاقل يتحقق جزء من الفراخ مع المش
يبقي متنوع يعنى

وشكرا لتعليقك ولرأيك
وانا سعيدة جداا برأي حضرتك

منور البلوج والبلوجات اللى جنب البلوج

kafrawy said...

انا من كتر ماتخيلت


تخيلت انى

مجتش هنا


تخيلى..........!

عاشقة الوطن said...

kafrawy

يانهار ابيض
لالالا
انت هنا فى البلوج فعلا
ده مش تخيل

تخيل كل اللى انا قلته والل انت نفسك فيه اصل التخيل شوية وهيبعوه بفلوس وهيبقي ممنوع التخيل بعد كده


منور ياكفراوى وشكرا على الزيارة

عروس البحر said...

تخيلت بس لقيت لو تخيلنا الدنيا حتتشقلب

عاشقة الوطن said...

عروس البحر

ماهى فعلا الدنيا بالشكل ده ممكن تتشقلب واحنا نفسنا تتشقلب بس تتشقلب مرة صح بدل ماهى بتتشقلب غلط كده

تعليقك جميل اووى
وانا نفسي نقعد نتخيل على طول يمكن حاجة من التخيلات ديه تتحقق

منورانى ياقمر ومنورة المدونة كلها

حبة حاجات (ايمان) said...

هههههههه
انا رايي محدش ينام تانى يا جماعه
واللى هينام ويتخيل هيقوم يا محبط يامحبط يامحبط

عاشقة الوطن said...

حبة حاجات (ايمان

تصدقي ان الواحد مش قدامه غير انه يحبط
ومفيش غير انه بجد يحبط

بس هنحاول ننام تانى ونحلم يمكن يعنى يمكن يتحقق حاجة من اللى بنحلم بيها

منورة البلوج ياايمان ياقمر

كل سنة وانتى طيبة